សៀមរាប៖ អភិបាលខេត្តសៀមរាបលោក ទៀ សីហា ទុកពេលឲ្យលោក  ខឹម វាសនា ត្រឹមម៉ោង១២ យប់ថ្ងៃទី៣០ ខែសីហា ឲ្យរំសាយការប្រមូលផ្តុំមនុស្សពីទីតាំងចម្ការរបស់លោកចេញដោយថាសកម្មភាពនេះគឺប៉ះពាល់ដល់សន្តិសុខសណ្តាប់ធ្នាប់សាធារណៈ។

ក្នុងលិខិតមួយច្បាប់ផ្ញើជូនប្រធានគណបក្សសម្ព័ន្ធដើម្បីប្រជាធិបតេយ្យចុះថ្ងៃចន្ទ ទី២៩ ខែសីហា លោក ទៀ សីហា បានលើកឡើងថា ការជួបជុំមនុស្សរបស់លោក ខឹម វាសនា នេះពុំបានសុំកិច្ចសហការ និងមានការអនុញ្ញាតពីអាជ្ញាធរមានសមត្ថកិច្ចឡើយ វាបានធ្វើឱ្យប៉ះពាល់ដល់សន្តិសុខសណ្តាប់ធ្នាប់សាធារណៈ បរិស្ថាន អនាម័យ និងវិធានការបង្កាប់ស្កាត់ជំងឺកូវីដ-១៩។

ដូច្នេះ ដើម្បីកុំឱ្យការប្រមូលផ្តុំ ការជួបជុំ និងការបោះតង់ស្នាក់នៅខាងលើធ្វើឱ្យប៉ះពាល់ដល់អនាម័យ បរិស្ថាន ការរីករាលដាលនៃការឆ្លងជំងឺកូវីដ-១៩ និងសុខុមាលភាពរបស់ក្មេង ចាស់ ប្រជាពលរដ្ឋ រដ្ឋបាលខេត្តសៀមរាប ជម្រាបជូន លោកប្រធានគណបក្ស បញ្ឈប់ការប្រមូលផ្តុំ និងរំសាយការជួបជុំ ចាប់ពីថ្ងៃទី៣០ ខែសីហា ឆ្នាំ២០២២ វេលាម៉ោង ២៤ៈ០០នាទីយប់។

ក្រៅពីនេះរាល់សំណង់ដែលបានសាងសង់ត្រូវដាក់ពាក្យស្នើសុំអនុញ្ញាតពីអាជ្ញាធរមានសមត្ថកិច្ច។

ការជួបជុំ និងប្រមូលផ្តុំគ្នាដែលដឹកនាំដោយលោក ខឹម វាសនា នេះប្រព្រឹត្តទៅនៅក្នុងភូមិសាស្ត្រភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាប ក្នុងគោលបំណងដើម្បីចូលរួមស្តាប់ការពន្យល់បកស្រាយនូវអ្វីដែលលោកបានផ្សព្វផ្សាយថា លោកបានធ្វើវិបស្សនាមើលឃើញ និងបំភ្លឺសារជាថ្មីនូវមេរៀនត្រាស់ដឹងរបស់ព្រះសម្មាសម្ពុទ្ធ និងដំណើរនៃធម្មជាតិ (ទឹកជំនន់) ក្រោមការរៀបចំរបស់គណបក្សសម្ព័ន្ធដើម្បីប្រជាធិបតេយ្យ៕